আছছালামুআলা্ইকুম,

বহুত দিন বাদে বাংলা লেখাত বইলাম, আরও আগ্রহর বেফার ওইল জিবনর ফয়লা সিলেটি লেখরাম।

আছকে লেখমু রাজনর খতা।

আমার বাড়ি সিলেট। রাজনর বাড়ি থাকি খুব বেশি দুর নায়। তারে জেখানো ফিটিয়া মারা ওইছে, এর সামনেদি আমি আর আমার বন্দুন বউত ছক্কর দিছি মটরছাইকেল লই্আ।

আমি ওখন ইংল্যান্ড থাকি বউ বাইচ্চা লইআ। সাতাইষার রাইত মসজিদও সেহরির লাইনও উবাইয়া কবির বাই আর ফরিদ ভাইর লগে বাংলাদেশ লইয়া মাতাত আছলাম। কবির ভাইয়ে খইলা, "ভাই, আমরা এই দেশে এসে অনেক সভ্য হয়েছি, দেশে থাকলে আমরাও হয়ত এমন করতাম"।

আমি দেশও দুইবার ছুর মারছি (মার্ডার নায়, ফিটা)। এখবার আমার ছাছার লগে, এখবার আমার ছাইকেল ছুররে দরছিলাম। আর রাস্তাত কুকুর রে ইটানি আছিল ফানি বাত। যত মানুস আর প্রানিরে মারছি, তারার খাছে খুলা মনে মাফ ছাইরাম, আল্লায় আমারে আমার বুজা না বুজা সব গুনারে মাফ করক্কা, আমীন।

কবির বাইর খতাত আই আবার, কবির বাইর বাড়ি কুমিল্লা, ডাখাত বড় অইছইন।আল্লায় তানরে বুজিয়া ইছলাম মানার তৌফিক দিছইন অদ্য। আমার লগে ফরিছ্য় এখ সাফ্তা আগে।

ইংল্যন্ডও ও মানুসে মানুসরে বর্বর বাবে মারে আর দেশও বহুত মানুসে মানুসর জীবন বাছার। ফার্থক্যটা বানাইআ দেয় আসলে ধর্মিয় বিশ্বাসে। কবির ভাই, আমি, আমরা মানুস অইছি খারন আমরা ইছলামরে জীবন ব্যাবস্তা বানাইবার সিদ্দান্ত নিছি। যদিও আমরার মাজে সুদ্দর চেয়ে বুল বেসী, কিন্তু আমরা চেস্টা কররাম।

আল্লায় আমরারে একটার বাদে একটা ফরিক্কাত ফালাইরা আর আমরা খালি ফেইল কররাম। বাংলাদেসর মানুস অখন নয়া নয়া সংস্ক্রিতি হিকরা। নাস্তিকতা অখন এখটা ফ্যাশন, ইন্দুআনি অইল বিলাসিতা। ঈদও অখন ফাখি ড্রেস লাগে, বিয়াত রাখিবন্দ ফিন্দানি অয় আর আস্তা ফরিবারে মিলিয়া ইন্ডিআন কুসংস্ক্রিতি দেখাতো রুজকার রুটিন।

মানুসর বানাইল আইন যতদিন কায়েম থাখব অতদিন মানসে ন্যায় বিছার ফাইত নায়, কারন আমরা আমরারে বানাইছি না, আমার লাগি কিতা বালা ইতা আমরার চেয়ে আল্লায় বালা জানঅইন। আইফোনো যেলা এন্ড্রয়েড ছলত নায়, আল্লার বানাইল আমরারেও ইংরেজ আর ড কামালর আইনে শান্তি দিত ফারত নায়।

আল্লার আইন মানার যে খয়টা স্তর আছে তার মাজে সব ফয়লা অইল নিজরে ঠিক করা। মানুসরে বালা ফাওয়া, আল্লার অন্য সব স্রিস্টিরে মায়া খরা, ইতাতো আমরার ধর্মর সিক্ষা। এখ কুকুররে জানে বাছাইআ এক ব্যাশ্যা জান্নাত ও গেছে, এর চেয়ে বালা উদাহারন আফনারে আমি কিতা দিতাম?


রাজনে আমরারে চউকও আংগুল দিয়া খয়টা জিনিস হিকাইআ গেছে:

১) বিছার ব্যাবস্তা, যদিও মানুসর বানাইল, এখটা ডংওর বিশয় অইগেছ। ফারতে কেউ আর ফুলিশ বা কউর্টর কান্দা কাছাত যাইত ছায়না।

২) দুই কারনে মানুসর ধৈর্যর বাদ বাংগের, ১। ইছলাম থাকি দুর হরি যাওআ ২। ফ্রছলিত ব্যাব্তায় বিচার না ফাওয়া।

৩) ইন্ডিআন ছিরিয়েল, নাস্তিকতার প্রসার, ধর্ম থাকি বিচ্ছুতি মানুশর মন থাকি আখিরাতর ডর আর দয়া মায়া তুলি দিছে।

৪) বিডিও দেখায় আমরা অত reaction দেখাইছি, আর্নাইলে ইকটা অন্য সব খুনর খবরর লাখান খালি ফত্রিকাত থাখল অনে।


বিশ্বাস করক্কা, যদি খুনি লীগ করত, তে মানব বন্দনকারী হখলরে ফুলিশে বাইড়াইয়া মারিল্লও অনে। আর যদি রাজন শিবির বা দল করত, তে কামরুলরে সামনর বার ইলেকশনো ছিলেট ১ আসন থাকি আলীগ এমপি বানানি অইল অনে।

আমরারে মাফ করি দিও রাজন। আললায় তোমারে বেহেশ্ত দেওক্কা। আমীন

তোমার মুসলমান বাই

ছাদি
১৪ জুলাই ২০১৫। বার্মিংহাম।