মন্দিরাহানাৎ তোর আঙুলিগ সককরলে ধ্বনিত অর হাবি শব্দ,
অকরের নুয়া রাগহান।
তোর কাকেইহানাৎ নুয়া মানুর অভ্যুদয়,মুঙর অভিযানহান তানুর।
তোর মেইথঙহান এগদে বুলেইলে নুয়া প্রেম আহান।হৌবারাদে তোর মেইথঙহান বুলেইলে আরাক নুয়া প্রেম আহান।
আমার অদৃষ্টহান তঙাল করেদে অত্যাচারর আধারহান গুড়া করে বেলা, হাবির আগে সময় এহানরে ধর - তোরে বারে বারে মাততারা শৌ এতাই। লালান কর,যেপেয়ৌ অক, আমার ঐশ্বর্যর সারাৎসার বার আমার খৌরাঙারে হাবি মানুর প্রার্থনাহান তোরাং।
চিরকালেৎত সালয়া অইলে তি যিতেইগাতা নিখিলে।
ঊষা
গ্রীষ্মর ঊষারে আলিঙ্গন করেছু মি।
প্রসাদ চুড়াগৎ ঔবাকা কিৎতাউ না নিককরল। পানিহান মরিয়া আছিল। ছেয়ার শিবির ঔতা বনর পথগ এরাদিয়া নাগেছেগা।তপ্তা বার জিংতা নিংসাহানি হজাক করিয়া কাকেই কারলু মি,মনিগিয়ে চেয়া থাইলা,পাখাহানি কায়া গেলগা ইমপানি।
মাটির পথগ বুজিয়া হদাছে তাজা মাম ঙালহানাৎ হাদি এহান,উগর পয়লাকার উদ্যমান ফুল আগ,ঔগই বাগেইল মোরে তার নাঙহান।
হুনার চুল ঝর্নাহান,পাইন গাছর হাদিয়েদে এরাদেছে চুলগাছি চেয়া মি মুকসি দিলু,দেবীগরে চিনলু রূপার রঙর চুড়াগৎ।
ঔবাকা আহানর পিছেদে আহান করে কাড়িয়া বেলা দিলু মেইখুম।বনবীথিৎ আন্দোলিত করিয়া আতহানি।সমতলে, মি তেইরে ত্যাগ করলু মুরুক আগর মুভে। বিশাল নগরীৎ চুড়া বার গম্বুজর হাদিয়েদে তেই পলেয়া গেলিগা ভিুকগর সাদে।
পথগ উচছেগা ঔপেই লরেল বন আকসপার কাদাৎ তেইরে বেরেইলু মেইখুন হানিল; খানি আহান পেইলু তেইর দেহগ। বনহানর জাঙহানাৎ ঊষা বার শৌগ পড়লগা।
ঘুমহান বাগিল ঔবাকা বেলিটিকহান।
আর্ত্যুর র্যাঁবো: ফরাসি বার বিশ্ব সাহিত্যর আচানক প্রতিভা আহানর নাঙহান। মিঙাল(Les illuminations)বার নরকে ঋতু আহান(une saisonin Enfar)লেরিক দ্বিয়হানি উনিশ কুড়ি বছর বয়সে (১৮৭২-১৮৭৩) ইকরিয়া কবিতার লগে হাবি সংস্রব ত্যাগ করল। অতি অল্প সময়ে ইকরেছে তার কবিতাই বিপ্লব আহান আনেছিল। প্রচলিত চিন্তা বার যুক্তিরে অস্বীকার করিয়া অপাপবিদ্ধ শৈশব বার অজ্ঞাতরে আয়ও করানি মনার কবিয়ে।ধ্বংস বার নির্মাণ,হপন বার বাস্তব আভিজ্ঞতা বার গারিগর দ্বন্দ্ব তার কবিতাৎ।ভেরলেনর লগে তার সর্ম্পক আছিল।কবিতার লগে সম্পর্ক ত্যাগ করিয়া আফ্রিকা বার প্রাচ্যর দেশেদে নানান ব্যবসা বানিজ্যল থাইলগা।
অনুবাদ: ধনন্জয় রাজকুমার
ছবির জন্য কৃতজ্ঞতা: http://www.levity.com
সর্বশেষ এডিট : ২৩ শে মার্চ, ২০০৮ দুপুর ১:০২