গোত্রল আমার দাপা এহান নিয়াম বেশেপে পরেসি । স্বগোত্রৎ লহঙর য়ারি হুনলে আরাকৌ বেশেপ । গর বাদ করেদিতাই লগে লগে । আকগৈয়ৌ না খালকরতারা গোত্রর য়ারি কিসাদে আমারাং আহিলতা ?
গোত্র শব্দ এগ পইলা আমি পেয়ারতা ঋকবেদে । ঋকবেদর গোত্র কথাহানর অর্থ অইলতাই গুরুর তেংকল । বাংলা ঠারে গরুর পাল । গোত্র কথা এহান ইংরাজিৎ clan মাৎতারা । clan কথা এহানৌ নিয়াম দিন আগরহান নাগৈ । দ্বিলিশিং বছর আগরহান ।
ছান্দোগ্য উপনিষদর মা গোত্র কথাহানর অর্থহান অইলতাই মানবগোষ্ঠী । গো = মনুষ্য । এহান ইলইলে গোলোকধাম কথাহানর অর্থহান মনুষ্যধাম ।
যেতাউ অক । আমি এপেই গোত্রর য়ারি দিয়ার । হিন্দু ধর্মৎ পইলাদে গোত্রপ্রথা এহান আসিলতাই ব্রাহ্মনরাং, (বামুনরাং কথা এহান এপেই না মাৎতৌ, কিয়া বুললে, ব্রহ্মত্ব অর্জন করেসি উতারেই ব্রাহ্মণ মাৎতারা, আরতারে নাগৈ), পিসেদে ক্ষত্রিয়, বৈশ্যরাং হমেইল ।
ঋষি কতগর নাঙে গোত্রর নাঙ । ভরদ্বাজ, শাণ্ডিল্য, মৌদগল্য এসাদে আটগ ঋষির নাঙে হাবি গোত্র । অর্জুনর গোত্রগ ব্যাঘ্রপাদ । অর্জুনর বংশধর বুলিয়া আমার বিষ্ণুপ্রিয়া মনিপুরী দাপাএহানে গর্ব করতারা নিয়াম । উহান অইলে হাবি বিষ্ণুপ্রিয়া মনিপুরী বেইবুনি অইলা । গোত্রগৌ আকগ অনি থক ।
বেশেপহান এপেই । স্বগোত্রল পাগল অসি দাপা উহান এবাকা কিহান মাৎতাই ? আমার দাপাএহানর লহঙ কার লগে অনি থক ?
এতাল রিসার্চ অর, অসে । হেনরি লুই মর্গান গিরকর Ancient Society লেরিক এহান এতা রিসার্চর য়ারিল ইকরাহান । গিরকে আমেরিকার আদিবাসী মানুর লগে তিলয়া উপসিল, তানুর মা নিয়ামপারা Tribes আছে । ট্রাইবস কথাএহানরে আমি দাপা মাতে পারিয়ার । ট্রাইব আকেইহান তানুর নিজর টোটেম য়াকরিয়া চলতারা । তানুরতা দৌ নেই, টোটেম আসে । যে দাপাহানর টোটেম কচ্ছপ, তানুর ঠাচাহান, যে তানু আহেসিতা কচ্ছপরাংত । আরাক ট্রাইব আকেইহানে নিংকরতারা, তানু আহেসিতা পাহিয়াৎত ।
তানু নিজর দাপাহানর মা লহঙ নাকরতারা । clan আকহান অইলে লহঙ করানি থক নেই, এহান তানু য়াকরতারা ।
আমার দাপা এহানৌ এসাদে খালকরতারা । নৃতত্ত্বর কথা ইলইলে এসাদে খালকরানি থক নেই । কাশ্যপ গোত্র, ভরদ্বাজ গোত্র, মৌদ্গল্য গোত্র (মধুকল্য), শাণ্ডিল্য গোত্র হিন্দু ধর্ম ইলসি হাবি জাতরমা আসে । মিয়াঙরাঙৌ মৌদগল্য, কাশ্যপ গোত্র আসে । বিহারী, ভোজপুরী, রাজস্থানী হাবিরাং আসে ।
গোত্র কিৎতাউ নাগৈ, এহান টোটেম প্রথার নালা আহান । ভরদ্বাজ শব্দ এগর অর্থহান অইলতাই বাজপাখি । আমেরিকার আদিবাসীয়ে যেসাদে তিতির পাহিয়ার তানু বংশধর মাৎতারা, আমারতাই এসাদে মাতে নুয়ারিয়া ঋষির নাঙ লসি । কাশ্যপ গোত্র কশ্যপ মুনির বংশধর বুলিয়া লেপসে । কশ্যপ কথা এহানর অর্থহান অইলতাই কচ্ছপ । শাণ্ডিল্য অইলতাই ষাঁড় বা বলদাগ ।
লাসপানির কিতাউ নেই, এতা টোটেম প্রথা । লিশিঙ লিশিঙ বসর অইল আমার রকতে এতা হমাসেতা ।
গোত্রল গইগ অনির আগে এতা ইতিহাস উপনি থক আমারতা । না উপয়া, স্বগোত্রৎ লহঙ না করিঅ, মাতানি থক নেই ।
মূল লেখকঃ সমরজিত সিংহ