মণিপুরের কবি শ্রীবীরেন। প্রকাশিত গ্রন্থগুলোর মধ্যে রয়েছে ৫টি কাব্যগ্রন্থ, একটি ছোটগল্প, একটি নাটক এবং একটি প্রবন্ধ গ্রন্থ। জন্ম - ১৯৪৬ , উরিপোক লৈকাই, মণিপুর, ভারত।

Click This Link



ঐগী ইশক

------------------- শ্রী বীরেন

ঐ খঙজরবনি তশেংনা
ঐগী কুচু মুই;
অদুবু
ঐহাক কুচু ঙৌবা পাম্মী হায়দুনবু
করিগী হায়গনি
ঐগি অমুবা কুচুবু ঙৌই হায়না?

নুংতিগি মিংশেন য়েংবদা
উজরবনি ঐনা
ঐগী অশেংবা ইশক ;
করিগী হায়গনি ঐগী ইশক থিদে হায়না
ঐগী অথীবা ইশক অসিবু
পাম্মী হায়দুনবু শক ফজবা?

অদুনা তাবিয়ু ঐনা হংজরিবসি
অথীবনা করিনো
থীদবনা করম্বনো?
ঐগী ইশক থী
অদুবু অথীবা শকসে
অশেংবা ঐগীদি ওইজৈদনা,
মীগীদগী ওয়াইরুবদি নত্রেদনা
নঙ হায়য়ু
ফত্রা মসিনা?


অদুগা
হায়জরিবসিনি ঐগীদি :
পেনজৈ ঐনা
চাউথোকচৈ ঐনা
ঐগী অথীবা ইশকসে
ঐগিনি হায়বসিদা;
ইকাইদে ঐ মসিদা।

২৮ জুন, ১৯৮৭


মপাল নাইদবসিদা ঐ, ১৯৮৯, ফোংবা- রাইটরস ফোরাম, ইম্ফাল।

---------------------------------------০০০০-----------------------------

[ শ্রীবীরেনগি শৈরেং গা খংনখিবসি ১৯৮৭-৮৮ দগিনি। নৌনা শৈরেং ইবা হৌরকপা মতমদগি মহাক্কী শৈরেংনা ঐঙোন্দা অনৌবা মহাও অমা ফংহনখি। মহাক্কি শৈরেং গী মরমদা, পুন্সি গী মরমদা মহাক্কী ওয়াখল্লোন - মীৎয়েং , কবি অমা ওইনা মহাক্না করি খনখিবগে, হন্দক্কি চহিসিদা ফোংবা " মণিপুরী সাহিত্যদা ওয়াখল্লোন খরা '' হাইবা লাইরিক সিদা শেংনা ফোংদোকলি। ময়ামগা পাবিনসি খনদুনা ব্লোগ সিদা মহাক্কী লাইরিকদুদা য়াওবা ওয়ারেং অনিখকখি পয়েন্ট খরা লৌখৎচবনি। ব্লোগতা অমুক ইথোকপা মতমদা বানান অমসুং লোনদা খরা অশোইবা য়াওরম্বা ( কম্পো. মিসটেক ) য়াই, তাকপিরুকউ, নুঙাইজগনি। - হামোম প্রমোদ ]


মণিপুরী সাহিত্যদা ওয়াখল্লোন খরা ( লন্নাই মীৎয়েং )
নোংথোম্বম শ্রীবিরেন
রাইটর্স ফোরাম, ইম্ফাল, ২০০৯ ।

ঐগী থনুংলোন ( ওয়াহৌদোক )
ভারতকী সংস্কৃত সাহিত্যগী মহাকাব্য রামায়ণগী ওয়ারিদা সীতাবু লঙ্কা নিংথৌ রাবণনা বনদগী হুদুনা পুখিবদগী রামচন্দ্রনা মশাগী ধর্ম্ম ঙাকনা তৌফম থোকপা মথৌ খঙনা লান্থেংনদুনা রাবণবু হাৎলগা মরৈবাক অযোধ্যা তগী সীতাগা লোয়ননা হল্লকপগী লম্বিদা কিস্কিন্ধ্যা লৈবাক য়ৌশিল্লক্লবদা য়োং ময়াম থোক্লক্তুনা সীতাবু য়েংলুরগা মহৈ-মহৈ ফজৈ -ফজৈ হায়নরিবদু তারুরবা য়োং অহল অমনা য়ানীংদবা উৎতুনা ‘নখোয়নদি সীতা মশক ফজৈ-ফজৈ হায়রিবা অদুবু মমৈদি পান্দেনে; কদাইদনো ফজরিববু? মমৈদু পাল্লম্মুদনা কমদৌগে য়েংউ; য়েংবা ঙম্মোইদবনি ফজবনা। হৌজিক মাগী মশকসিদা ইহাঙ হাঙবগুম ইকোক কোকপগুম করি গুম্বা অমা ইওয়াৎ ওয়াৎপগুম মপুং ইফা ফাদ্রিবদুনি। তৌদ্রনে? অসুম্মা ইখঙ খঙহৌদনা হায়দোরকই হায়না কোলেজ অমদা ফিলোসোফি তম্বিবা ওজা মরূপ অমনা নুংথিল ওয়াল্কিং চৎমিন্নবদা নোংমা ঐঙোন্দা লীরম্বনি। অহানবা হেক তাবদদি ফাগি ওইরবোই নীংলুই। অদুবু খন্থরুবদা মতৌ মান্দান অর্থ থোক্লকই। অসুম অসুম ওয়াহন্থোক লৈরকই। ওয়ারী মতাংসি রামায়ণ দা তশেংনমক য়াওব্রা য়াওদব্রা খঙজদে। ঐ থিসু থিজরুদ্রে। থিরুবগী ঐঙোন্দা থোইনা মথৌ তাদে। মসিদা ঐনা নুংঙাইজরিবদি য়োংদুগী থনুংঈনুংবুংদা ফজবগী লৈরোং অমা হান্না শাৎতুনা লৈরম্লিবদুনি। মদুনা ঐনা হান্নদগী খন্দুনা মতম কুইনা থাজরকপদু শোয়দ্রে হায়না অমুক্কা হেন্না থাজহল্লি। য়োংদুনা মচিনদা হায়দোরক্লিবসি মাগী অকোয়বনা পীরক্তুনা মাগী থনুংলৈহাওদা শাৎলিব মাগী ফজবগি থনুংথওয়াইনা ফুগায়না শাফোঙলকপনি। মসি মাগী ক্রিয়েটিভিটিনি। ( পৃঃ ১৫ )

--------
অনৌবা মিৎয়েংগী অচুম্বা:
চানীংঙাই লৈত্রবা, লায়েংবা ঙমদ্রবা লায়রবা অনাবগী মনাক্তা ইনাক খুনবা থাউ থোকপনা মরি মতা হন্না য়েংনদে, শেল পীয়ু, শেল পুগে হায়রক্কনি থৈ থৈদুনা চৎনৈ, কৌজরুবদা খুম্মমদনা চৎনখি, কৌরকপদা খুম্মুবা কিরবা অনাবদু শিরগদি হিংলিঙৈদা মনাক্তা চঙবা করিম্ব দু কিদ্রে, শোরাৎতা ঐনা চাবা ঙমগনি, ঐনা ফি ঙমগনি, দক্ষিনা ঙমগনি, ঐনা শয্যা ঙমগনি লোইনা হুপচল্লিকই মরমদি শাগৈ মরী-মতা সমাজ মমাঙদা চোপ্পা য়াদে ঐখোয় চোপ্পা য়াদে ঐখোয় চোপ্পা য়াদে। চরা হেন্দুনা শিখিবা মীদুগি শোরাৎ য়াম্না চাউনা লুপা লিশিং চঙনা শোল্লি; শোন্নৈ লৈবাকনা মাগী শোরাৎ ফজৈ ফজৈ। কনাসু নীংশিংবিদে থওয়াই অমনা চাবা ফংদদুনা, নীংবা থুংদনা ঙৌনা ঙৌনা শীখ্রে হায়বা। শোরাৎ লোইরগা অমুক লুখ্রাবী মমা মচা মখোয় মঙাতা; কনাসু হন্না য়েংবীরদে, তুমিৎ অমা ফাওবা পাইরদে, চরা হেনবনা পুক পায়দুনা থরো থরো ওল্লি; মতমসদিা কনানসু তাবীরোই, তাসু তানীংদে মখোয়গী তেংথা। মসিবু ঐখোয়গী সমাজগী ওর্দর নাইবা ফজখ্রবা করম্বা মওংনো? বৈষ্ণব সমাজগী করম্বা মীনুংশিনো? একজবিসিন্নজিমনা হেনমল্লবা ঐখোয়গী সমাজদা চৎনবীগী, মমিংদা ফজদে খনবগী, ধর্মগী কল্লবা দিমান্ড অসুম খাঙবা ঙমদদুনা লন্নাই থওয়াই কয়া কয়ানা থরো থরো ওনদুনা খাঙলি। মতম কুইনা লায়েংলুবগী পৈশা মরি তাদ্রবা ইমুংদা র্ধম্মনা দিমান্ড তৌরি, চৎনবিনা ইজ্জৎনা দিমান্ড তৌরি- শেল চঙলবা শোরাৎ। ইঙখোল বন্ধান থম্মু, মীঙোন্দগী শেল পুরু, মদু সমাজনা উফম থোক্তে নঙনা ওয়াবা, নঙনা চরা হেনবা, নঙনা লৈনীঙাই ইঙখোল লৈতবা সমাজনা উফম থোক্তে।