মনিপুরি খুন্নায় অমসুং লেইঙাকলোন্দা নুপী লান
মাইবম সাধন


['মনিপুরি চাওখৎ খোঙথাং নুপী লুপ'না শিনলাংবা ১২ডিসেম্বর ২০০৮, নুপী লান নিংশিং থৌরমগা মরি লৈননা ইখিবা অমসুং রামনগরদা পাংথোকখ্রবা সেমিনার'দা পাথোকখ্রবা চেরোল অসিবু ব্লগকী রিডারশিংগী মফমদা অমুক থমজরি। নুপী লুপ'কী মায়কৈদগী হায়জরকপদি 'মনিপুরি খুন্নায়রোল অমসুং লেইঙাকলোন্দা নুপী লান'না মতমদুদা পিখিবা অমসুং হৌজিক হৌজিক পিরিবা অহোংবশিং' অদুবু হেডলাইন অসি পা'বদা লেইতোন লুমথরকখিবনা খজিক্তং লংলা-লংজিন শেমদোক্তুনা 'মনিপুরি খুন্নায় অমসুং লেইঙাকলোন্দা নুপী লান' হায়না লাথুপ চনজরে। তৌববুদি খুন্নায় অমসুং লেইঙাকলোন্দা নুপী লান'না মতমদুদা অমসুং হৌজিক হৌজিক পিরিবা অহোংবশিং'বু লীসাংশিৎনা চেমায়সিদা লাথুপ চনজগে খনজবনি। চমম্নবা নত্রগা ওমচাক্নবা ওয়াহৈ কয়াবু খোর্জ্জৈ ময়েক লান্নসি, অসিদা- [email protected]]

থৌদোক ওয়াথোক খুদিংমক্কি হৌফম'মা লেই। লেই মহাক্কী ইশিং-নুংশিৎ ফিভম-মতম অকোয়বগী ইনিনসু। ইনিনদগী মেইরিক, মেইরিক্তগী মেই, মেইদগী মেইশা। নুপী লান'সু অদুম্মকনি হায়জনিংই। চেইথেংদগী মেইরিক, মেইরিক্তগী লান। মতম খেন্নবগী মিৎয়েংদা 'নুপী লান' অসিবু অহুম থোক্না য়েংবা য়াই। অহানবা নুপী লান (খৃস্টগী চহিরোন ১৯০৪), অনিশুবা নুপী লান (খৃস্টগী চহিরোন ১৯৩৯) অমসুং অহুমশুবা নুপী লান (খৃস্টগী চহিরোন ১৯৭৯-৮০ দগী হৌরগা ঙসিফাওবা লীসাং সিৎনা চত্থরক্লিবা..)। অসিদা অহান্বা অমসুং অনিশুবা নুপী লানগী মথক্তা মিৎয়েং থম্লগা মনিপুরি খুন্নায় অমসুং লেইঙাকলোন্দা নুপী লান'গী থৌদাংবু খুৎনমজগে হোৎনজবনি।

১.
খোঙজোম'গী অকনবা চেইথেংনা নেইহৎলম্লবা মনিপুর'গী নিংতম্বা'গা লোয়ননা লোয়লম চনখ্রবা মীচমশিংনা বৃটিশশিংবু চিকনিংলবসু চিকঙমদনা খাঙনা লেইরিঙৈ মতমদা মেজর এইচ সেন্ট পি ম্যাক্সওয়েলনা মনিপুরগী 'পলিটিক্যাল এজেন্ট' ওইনা লাকখি। হায়রিবা ম্যাক্সওয়েল অসিবু মতমদুগী মনিপুরিশিংনা 'বড় সাহেব' অমসুং মহাক্কী হেক ঙমথংদা লেইরিবা অফিসারশিংবু 'ছোট সাহেব' হায়না খঙনরম্মী।

খুদুম তাশিনখিবগী হরাও-খোয়রাওনবগা লোয়ননা অঙৌবা উন-শা'গী 'কোলোনিয়াল ইগো'দগী ম্যাক্সওয়েল মশামক 'সুপারিন্টেন্ডেট অব দি স্টেট' অমসুং বৃটিশ লান্মী-অফিসার খূদিংমক্না 'লেইপাক অসিগী মপু মখোয়নি, অতৈ ময়ামসিনা মখোয়গী মীনায় ওইনা লেইগদবনি' হায়বগী অকন্বা ওয়াখল্লোন অমা চেনখি। অদুনা বৃটিশ অফিসারশিংনা তৌনিংবতা তৌখি। খুদম ওইনা- ম্যাক্সওয়েলনা মহারাজ সুরচন্দ্রগী মজাইবেম্মা মপুরোইবা লেইরিবা সনাতোম্বী'বু 'পামি' হায়দুনা লৌখিবগী মতুংদা সনাতোম্বীগী মপুরোইবা মনিচান্দ'না য়ানিংদবা ফোংদোকনা চিঠি ইরবসু করিমতা কান্নবা ফংখিদে'। অদুবু বৃটিশ অফিসারশিংগী অচেংবাবুদি মনিপুরিশিংনা মতম খূদিংমক্তা ঙাইদুনা লেইরকখি।

অসুম্না লেইরিঙৈ চৈরক্তুদা, নোংমা বড় সাহেবকী বাঙ্গলাগী শুমাঙদা মান্ডপ চাওনা খল্লগা সনাতোম্বীনা মকোক চিংলগা নিত্যরাস শান্নরম্মী। বড় সাহেব, ছোট সাহেবকা লোয়ননা অতৈ বৃটিশ অফিসারশিংসু য়েংখি। 'জগোই রাস শান্নখ্রবা মতুংদা নুমিৎ ৮নি লৈরগা মাচ্র্চ ১৫, ১৯০৪ গী অহিংদা শুতো সাহেবকী বাঙ্গলাবু মৈ থারমদুনা তুম্না চাকখি'। থৌদোক অসিবু ম্যাক্সওয়েলনা মনিপুরি মচাশিংনা উশিৎত্তবনি খন্না 'মৈনা চাকখ্রবা বাঙ্গলা অদু অমুক হন্না শানবগীদমক মৈতৈ মচাশিংনা উ-ওয়া য়াল্লুরগা পুখৎলক্কদনি হায়বা হুকুম অমা সেপ্টেম্বর ১২, ১৯০৪দা থোরকখি। মদু য়ানিংদে ককথৎপিয়ু হায়দুনা বোর সাহেবতা হায়জরুবদা য়াবীরকখিদবদগী লৈবাক ওয়াথোক ওইরক্তুনা বোর সাহেবকী মায়োক্তা আন্দোলন হৌখি। মদুদা নুপাশিংবু ঙম্না ফাজিনখিবদগী নুপীশিং পুল্লপ হৌরক্তুনা ফাজিনখিবা নুপাশিংবু থাদোকউ হায়বগী অকনবা খোঙজং অমা ১৯০৪গী অক্টোবর থা'দা চংশিনখি'। খোঙজং অসিবু এইখোয়না মনিপুরি ইতিহাসকী লামায়দা 'অহানবা নুপী লান' হায়না খঙনরিবসিনি।

মথংদা অনিশুবা নুপী লানসু সুদত্তুনা থম্বিরম্লবা মীয়ামগী খাঙঙম্লক্তবা ইথিন্দগী পোক্লকখিবা অচুম্বগী থৌনা অদুনা ইনোৎ হাপ্তুনা চঙসিলকখিবা শেনমিৎলোনগী লানফমদতা নত্তনা লেইঙাকলোনগী মাইওন অমা শেঙদোক্লম্মী। মরমদি '১৯৩৯গী লৌরোক থা মক্তদা মীয়াম্না কৈথেলদগী ফৌ ওয়ানবা ফংনখিদে, চেং-চাক তাঙলকপদগী ডিসেম্বর তাং ১২দা নুপীশিংনা ইম্ফাল ময়োলদা থোরক্তুনা চেঙ থাবা থিংখিবগা লোয়ননা বৃটিশকি পলিসি অদুগী মায়োক্তা খোল্লাও কয়া লাওখি। ময়ামগী ঈহৌ অসিবু হোৎনবদা বৃটিশনা সিফাইশিং সিজিন্নদুনা ফুবা চৈবা বেয়োনেট থিনবানচিংবা কয়া তৌখি। অদুবু নুপী শিংগী ঈহৌ অদু হনখিদে'। অসিগুম্বা মথোঙ হুক্তবা লেইঙাক ওয়ায়েলগী মায়োক্তা নুপীশিংনা লৌখিবা থৌদাংবু নিংশিংদুনা ঙসিসু মনিপুরি ইতিহাসকী লামায়দা 'অনিশুবা নুপী লান' হায়না মীয়াম্না খঙনরিবসিনি।

২.
মনিপুরি খুন্নায়দা শেনমিৎলোনগী শোত্থরবা 'থোঙ্গাল মমি'বু নুপী লান'না য়াম্না ময়েক শেংনা উহল্লম্মি লোয়ননা শেনমিৎলোনগা পলিটিক্স য়াম্না নক্ননা মরি লেইনেই হায়বদুসু খূদোম্বি থিন্না তাকলম্মি। শম্না হায়রবদা, মী অমগী খুৎ য়েৎ'না শেনমিৎলোন অদুগা পলিটিক্সনা খুৎ ওই নত্রগা খুৎ য়েৎনা পলিটিক্স, শেনমিৎলোননা খুৎ ওই'নি হায়না খল্লবদি ওয়াফমসি কদায় য়ৌরে..? (ওয়াফমসি অদুঙৈ মনিপুর খক্তা নত্তনা ঙসিগী মনিপুর অমসুং বাংলাদেশকী মনিপুরিশিংগী ফিভমগসু চাংদম্নবা মথৌ তায়। বাংলাদেশকী মনিপুরিশিংগী মতাংদা অতোপ্পা খূৎই অমদা ময়ামগা থেংনজগে..)

লেইবাক ওয়ায়েল্লিবা মীওই/ফুরুপশিংগা লোয়ননা খেনফমদুদা পলিটিক্স অমসুং শেনমিৎলোনগী লানফমদা য়ুম্বী ওইরিবা ললোনবশিংনা খোঙজং অমত্তদা লেপখ্রবদি শত্রং শগোন মায়োক্নবদা য়াম্না নুংশা থিনিঙাই ওই। নুপী লান'না অদুগী শেংলবা শক্তমনি। মরমদি মচানা 'ইমা চাক চারগে, চাক পীরো' হায়বা মতমদা করি পাওখুম খুমলগদবগে খনবদা চরম খ্রক খ্রক কংলিবী ইমা-ইবেলশিংনা চা'দা থক্তনা মতমদুদা লেইবাক ওয়ায়েলগা লোয়ননা লেইঙাকলোনবু চ্যালেঞ্জ তৌখিবসি খুন্নায় অমসুং লেইঙাকলোন্দা অনৌবা চৈফু'মা পীরম্বনি।

অমরোমদা মথৌদাং পাংথোকপা ঙমলুদ্রবা খুন্নায়গী থৌবুরেলশিংবু মিৎ পাংথোকহনলম্বতা নত্তনা মতম শাংনা মথৌ মাংলুরবা থাংগুম্না পংশন্ন লেইরুরবা মনিপুরি নুপী খুন্নায়বু নৌহৌনা শকতম লাকহনখি, তুংগী মীরোল ওইরিবা খুন্নায়বু মতিং হাপলম্মী। খুদম ওইনা- ঙসিগী মৈরা পাইবীদগী হৌনা অতৈ অতৈ অর্গানাইজেশনশিংসু 'নুপী লান'না থৌনা লিংজেল হাপলমবনি হায়বদা হায়মনবা ওইরোয় হায়না খঞ্জৈ।

৩.
মনিপুরি ইতিহাসকী লামায়দা ময়েক লা'না লেইরিবা 'নুপী লান'বু মিংচৎ মিংথোন নিঙমাং তুংশিনজনিংবা অইবা খরনা 'নুপী লান' হায়বসি করিনো, করিদগী হৌরকপনো, করিমাইনা খোঙজং অসি খুমাঙ চংশিনখিবগে হায়বসি চপচানা থিজিন হুমজিনদনা নিঙক নিঙকপদা অমুক নুপীগী লান, অমুক মনিপুর নিংতম্বা লান, অমুক চা ফংদবগী লান'নি হায়না 'চয়েৎনবা পোকহন্বা' খুৎই য়াম্না ইরি। মখোয় খক্তসু নত্তনা 'বিষ্ণুপ্রিয়া' কৌবা ফুরুপ অসিগীসু 'ঙম্লিবমখৈ লান্না শন্দোক্লো' হায়বগী ওয়াফম্মসু লৈরে।

অদুবু ওয়াফম অমতংদি মীয়াম অমসুং মথক্তা পঞ্জখিবা 'চয়েৎনবা পোকহন্বা অইবা'শিংগী মফমদা ময়েকশেংনা হায়জনিংঙি- 'নুপী লান' নুপী খক্তনা লান্থেংনখিবা নত্তে, 'নুপী লান' নুপীগী হক/অধিকার তান্বা লান নত্তে, 'নুপী লান' মনিপুর নিংতম্বা তানখিবা লান নত্তে, 'নুপী লান' চা ফংলক্তবখক্তগীসু লান নত্তে।

নুপী লান মতমদুগী মথোং হুক্তবা লেইবাক ওয়ায়েল-লেইঙাকলোনগী মায়োক্তা হৌখিবা লান'নি। ফ্রি ট্রেড পলিসিগী মিংদা মপান লমদমদা ফৌ-চেং থাদোকপা, হুমাং মমল পিদনা থবক শুহনবা, পোর্টার ওইনা শিজিন্নবা, মরম চা'দনা ট্যাক্স খায়গৎপগী মায়োক্তা হৌখিবা লান'নি। নুপী লান অপুন্বগী লাননি, মীয়ামগী লাননি।

নুপী লান হৌরিঙৈ চৈরক্তুদা, ১৯৪০ গী আগস্ট থা'দা নুপী লান লুচিংবাশিংনা,লেইঙাক্লোইশিংগী মায়োক্তা কেস অমা ফাইল তৌখি। ফাইল তৌখিবা কেস অদুদা কুমারী, রজনি, মাইপাকপী, সনাতোম্বী অমসুং ঙাংবীনা খুৎয়েক পীখি। কেস অদুগী ওয়াফমশিং মখাদা থমজরি -
০১. The unfitness of the Durbar Members,
০২. The unfitness of the Police Members,
০৩. The illegal action of the Inspector of Police,
০৪. The illegal action of conviction of four women,
০৫. The unexpected police assault on the Public on Jan 14, 1940 and
০৬. The illegal action of Dulap Singh, Amin..

ইমা-ইবেলশিংনা হন্বা লেইতনা চত্থরক্লিবা খোঙজং অসি মালেমগী অনিশুবা লাঞ্জাও মনিপুরদা লাক্কদবগী ফিভম অমদগী লেইবাক মীয়াম্না মাগী মাগী মফম চাবা মফমশিংদা হিংনবা চেন্নবা হৌরকপদগী তপ তপ্না শোত্থরকখি হায়বা য়াই। অদুবু মনিপুরি নুপীশিংগী থৌনা লিংজেল মালেমগী ইতিহাসতা মুৎনায়দনা লেইহৌরগদবা থৌদোক্নি।

অসুম্না চেন্থরক্লিবা মনিপুরি ইতিহাসকী ঈচেলদা, মনিপুরি জাতিগী থৌদোক কয়াদা, মনিপুরি খুন্নায়গী পাক্ল লেইমায়দা মনিপুরি নুপীশিংনা লেপ্তনা থৌদাং কয়া য়াদুনা লাকলি লোয়ননা গ্লোবালাইজেশনগী তাঙ্কক অসিদা, ঙসিসু নাৎকী শক্তম ঙাকপদা খায়দগী চাউনা শরুক য়ারিবাশিসু নুপী খুন্নায়নি। অদুনা মতম খূদিংমক্তা মনিপুরী খুন্নায়দা থৌনা লিংজেলগী সিম্বোল'মা ওইনা 'নুপী লান' মুৎনায়দনা লেইরগনি।